Wir Johannes von gotis gnaden apt des gestiftis sencte Pauline Celle, ordinis | sencte Benedicti, bekennen vor uns unde vor alle unse nachkamen, daz wir recht | unde redelichen vorkouft haben unde ewiclichen | vorkouffen unser samenunghe alt unde iunghen gemeynlichen den herren des obgnanten unses clostirs zcwey phunt geldes guter phennig gulde alle iar ierlichen uf sencte Michils zcu gebene von den zcinßen, dy wir haben in dem geschoße zcu Kongisse, und dy selben zcwei phunt geldis sullen ewiclichen dyne alle wochen zcu eyner messe dy dy obgnante unse samenungbe halde unde leße sal uff sencte Andreas altire des heiligen zcalfbaten zcu den drygen messen, dy dy von Kranichfelt zcu dem selben altire gewedymet hat, unde dy selben zcwey phunt geldis haben wir en vorkouft unde gegeben umme zcwenczig phunt gutir phennige dy su uns genczlichen unde nuczlichen bezcalt haben von dem gelde daz meistir Clawis Smed zcu syner zele selekeit em bescheiden hat. Were ouch daz en abeginge an den obgnanten zcinßen, daz sullen wir unde unse nachkamen en erstate an andirn unses clostirs guten. Ouch haben uns dy obgnante samenunghe dy gunst getan, daz wir odir unse nachkamen en dy obgnanten zcwey phunt geldes mogen wedir abekouffe umme dy obgnanten summen geldis welchis iaris wir wollen, also daz der wedirkouff gesche sal vor sencte Walpurge tage unde nicht daz nacht. Czu orkunde unde warir sichirheit alle deßir hy vor unde nach beschreben rede, stucke unde artikile deßis briffes des haben wir obgnantir Iohannes apt unse insegil an deßin uffen briff gehengit.