Wir apt Conrad von Ischirstete von gotz gnadin der Cellen Palin bekennen uffinliche an dissem geynwertigen brife | allen den, di en sehen, horen adir lesin, daz wir mit gutin willen vor kouft haben recht unde redelich hern Gun|tir prior unde der samenunge gemeynlich eyn phunt geldis ierlichis zcinsis alle iar zu reychene unde zu gebe|ne uffe sente Michils tag, also czins recht ist, ume zcen phunt phenninge gengir unde gebir, di si uns nuczlich beczalt han unde wir di selbin phennige an unser goczhus nucz unde vromen gelegit habin. Den selbin czins schal reyche unde gebe Henrich Breytinherde, sin eliche wertin unde sin erbin von eyner halbin hufe landes, gelegin zu Vbirnhengilbach in felde unde in dorfe, czwelf schillinge uffe sente Michils tage, virdehalbin schillinge uffe sente Andreas tage, czwei hunre vor sechs phenninge unde vir schillinge phenninge uffe sente Walpurge tage an allerlei hindirnisse unde widirrede. Ouch habin uns di vorgenanten koufere di gunst unde fruntschaft getan, daz wir den vorgescrebin czins mogin widir koufen ume di megenante summen geldis vore sente Michils tag, welche czit wir mogin. Wanne wir daz geteten, dor noch so solde unser czins ledig unde loz sin uffe sente Michils tage ane allerlei argelist. Daz alle disse vorgescrebin rede, stucke unde artikil stete unde gancz gehaldin werdin, des habin wir unser eptige ingesigel an dissen uffin brif gehangin.