Wer Iohans von gotis gnadin apt, Heinrich von Heczstet prior, Conrad Bischoff custor und dy gancze samenunge gemeynlichen ald und jung des heyligin | closters sand Paulin Celle, send Benedictes ordins, Menczer bischtums, bekennen offinlichen an desem unsem offin briffe allin lutin, dy en sehen, horin ader lesin, | das wir eyntrechtlichin capitulariter mid wol bedachtem mute und mid gutem vorrathe dorch sundirlicher schulde und noitdorfft wegin unses goitshuses recht | und redelichin vorkauft habin und vorkauffin und krafft disses briffes den geistlichen ern Ottin vome hoffe probiste, frouwin Felicitas eptischin und der ganczen samenunge der heyligin clostirfrouwin czu Ilmen, grawis ordins, czwey phunt geldes ewiger und ierlicher phennig gulde in unser und unses goitshuses eygin dorffe und czinsluthin zu Elchleybin und habin en dy selbin czinse gegebin vor czwenczig phunt phennige, dy ym lande czu Doringin wol genge und geneme sint, dye uns dy egeschrebin kouffere genczlich, gutlichen, wol und nuczlichen beczalt habin und dye wir obgeschrebin vorkauffere uff gnomen habin und in unsen und unses goitshuses nucz, fromen und noitlichen schuld gewant und gegebin habin. Dy selbin czinse habe wir obgeschrebin Iohans apt und gancze samenung des egeschrebin clostirs sand Paulin Celle den egnanten unsen kouffern deme probiste, der eptischin und der ganczin samenunge des closters zu Ilmen bewiset und bewysin mid hant und mit munde und ane sye bracht in unser vorgnantes dorff und gerichte czu Elchleybin an desen nochgeschrebin czinslutin und iren gutin: Conraid Dornfeit und syne erbin sal gebin sechse und dryßig schilling pheninge von eyner hufe artlandis und ire czu gehorunge, gelegin in deme felde des egnanten dorffis czu Elchleybin und Syfrit Berntlauwe und syne erbin sal gebin fyr schilling pheninge von eyme sedelhoffe in dem selbin dorffe czu Elchleybin gelegin. Dese selbin czinse sullin alle iar ierlich vorvallin sye und beczalet wordin uff sente Michels dag und abe sy sumig wordin unde der czinse nicht beczalthin uff dy egnante tagecziit, so sullin dy egeschrebin kouffere ader ire amechtlute, weme sue es bevelin, von iren wegin phende und macht und gewalt habin czu phendene umbe ire czinse ane allerhande insproche. Were ouch, das den egnanten kouffern icht abe ginge ane iren czinsen dy wir en hye vorkauft habin, in welcher cziit ader uff wilch iar das were, das sullin und wullin wir obgeschrebin Iohans apt und gancze samenunge des egnanten closters sente Paulin Celle, dy icczunt sint ader czu czu kommen cziten werdin, den obgnantin unsin kouffern vol komlich er state und ervolle an allin unsin guthin dye wir habin czu Elchleybin in velde und in dorffe ane argelist. Dar uber habin uns dy egnantin kouffere gunst, fruntschafft und willin gethan das wir sullin und mogin, in welcher cziit des iares das uns aller best ebent, dy vorgeschrebin czinse czwey phunt geldes weder kouffe vor czwenczig phunt phennige, dy im lande zu Doringin wol genge und geneme syn und unvorslagin, alzo doch das vor alle vorseßene czinse ab der icht vorseßin wer genczlichen und czumole beczalt synt, alle argeliste ußgesloßin. Des zu orkunde unde warer steter haldunge aller vor und noch geschrebin rede, stucke und articel und yxliches besundirn, das dy stete und unvorbrochlichin gehaldin werdin, habe wir obgnantir Iohans apt unde dy gancze samenunge unse ingesigele wißentlichin gehenget an dissen briff.