Wir Gunther von gotis gnadin apt zcu der Paulin Celle bekennen uffenlichin an dysme | keynwertigen briefe und tun kunt allen den, dy en sehen odir horen lesen, daz Albrecht von | Goyls burger zcu Blankenberg und alle sin erbin met gutir vorbedechtikeyt und met | gantzcem willen vor kouft had und vor koufet recht und redelichin deme bescheiden und dem geystlichin hern hern Peter von Erforte, unsme monche, und unsme gotshuse dry Schillinge pheinge genge und gebe und zcwey hunre, den get Hartmod Reinhardis von dren agkern artlandis und hophgarten, dy da legen vor deme hayn, und XVIII pheinge, dy da get Her[man] Gumperde von virdehalben agker artlandis, dy da legen by der mol, ierlichis zcins alle iar zcu gebene und zcu bezcalne uf sente Michels tag und ewiclichin zcu habene und zcu besytzcene an allerleyge hindernisse und wederrede umme zcwen und funzcig schillinge pheinge genge und gebe, dy her und unse gothus en gutlichin, nutzlichin und gentzlichin bezcald haben. Der vorgenante zcins ist gekouft und sal gevalle zcu eme ewygen lichte, daz da ist gemacht zcu dem heyigen cruce. Daz alle dese rede und kouf stete, gantz und unvorruckyt blibe, habe wir vorgenante apt Gunther dez vorgenanten closters dorch bete willen der vorgenanten vorkoufer und koufer unse insegel an desin brief gehenget.