Wir Hannes von gotis gnaden grave unde herre in Swarczburg mit allen unsen erbin bekennen uffelichen | vor allen guten luten, dy desin briff sehen, leßen odir horen leße, also dy erwerdigen er Gunther Schonsmed | pristir unde pherrer zcu Elchleibin unde vrowe Emele, Conradis Schonsmedis zelige eliche wertin, burgerin zcu | Erfort, zcenhen guldin geldis ierlichir zcinße, dy su gekouft habin umme zcenhen guldin unde umme hundirt guldin an der stad unde ratzhuse zcu Saluelt, zcu eyme ewigen zelegerete unde spende bescheiden unde gegebin habin nach orre beydir tode, daz dy eyn ixlichir syczende rat in unsir stad zcu Kongisse ynneme unde usgebe sal, nach deme also sue sich des vorbrifft unde vorschrebin habin, daz daz mit unsem rate unde wissen gesehen ist unde wir egnantir Hannes grave mit allen unsen erben unde nachkamen gelobin, ab ymant der obgnanten spende unde zelegerete abezcin wolde odir vorhindere wolde, wy daz queme, daz wir da wedir sy wollen unde dy beschure unde bescherme wollen, daz dy ewiclichen blibe unde getruweclichen gegebin unde gehalden werde unde nichtz vorrockt werde durch allir unsir zele zelekeit willen, des zcu warir sichirheit unde orkunde habin wir unsen seghil vor uns, vor alle unse erben unde nachkamen an desin uffen briff gehengit.