Bertholdus dei gracia sancte Maguntine sedis archiepiscopus sacri romani imperii per Germaniam archicancellarius | princeps elector honorabilibus ac religioso devotis nobis in Christo dilectis n. monasterii in Reinhartsborn abbati | ac Simoni Voltziken doctori ac cantori etc. salutem in domino sempiternam et in commissis diligenciam adhibere. Sus|cepti oneris officium nos admonet, ut gregis dominici curam habeamus, recta conservemus, lapsa reformemus religionemque in melius augeamus. Sane cum in monasterio Paulinatzel ordinis sancti Benedicti nostre dioceseos nonnulla circa vitam et observanciam regularem ac alia ad statum et regimen dicti monasterii spectancia reformanda essent, que etsi in melius reformare summopere desideremus, arduis tamen hoc tempore nostris et ecclesie nostre curis ac negociis prepediti illis personaliter intendere non valemus atque ideo vobis, de quorum prudencia et integritate plurimum confidimus, tenore presencium committimus atque mandamus, quatenus, si opus fuerit, adhibitis aliquibus religiosis personis ad id aptis dictum monasterium in Paulinatzel decenter et sine gravi illius monasterii impensa vice et auctoritate nostra accedatis illud in capite, membris, religione omnibusque aliis visitetis ac in regularem vitam iuxta eiusdem ordinis arciorem observanciam reformetis, corrigenda et emendanda emendetis, superflua evellatis, ita ut omnia et singula iuxta illius ordinis salubria statuta ad fructum et religionem uberiorem reduxisse videamini, vobis preterea committentes ac mandantes, ut personas, si que forte, quod absit, contumaces, rebelies aut hoc sanctum propositum impedire volentes reperti fuerint, per censuram ecclesiasticam aliaque juris remedia et, si opus fuerit, per custodiam coerceatis atque omnia alia et singula faciatis ac statuatis, sine quibus dicta visitacio et reformacio expediri et prefici non poterit, cum potestate absolvendi in hoc negocio omnes et singulas personas in casibus nobis de jure vel consuetudine in foro penitencie reservatis processumque et ordinacionem per vos in vim hujus nostre commissionis fiendam vestris sub sigillis perfecto negocio ad nos remittatis rem eterna laude ac premio dignam facturi ac officiis vestris et desiderio nostro in hoc satisfacturi. In cujus rei testimonium sigillum nostrum presentibus duximus appendendum.