Ich Reynhart von Holbach, Hannes von Holbach unde Petir Boynstete bekennen offelich mit deseme | brife unde tun wizsen alle den, dy en seen unde horen odir lesen, daz wir gelobit unde gereyt haben eyntrechlichen | mit gesammiter hant unde sebtschuldig wordin syn mit unser frundynnen Iutten von Grizheym, dy da wertin | gewest ist Heynrichs von Grizsheyms, vor sechs mos kornis unde sechs mos gersten unde seben mos havern unde vor zcwalf schillinge phennige unde vier hunre unde eyn virteil erweis alle iar genczlichen zcu gebende unde zcu reichenne dem apte unde clostere zcu der Pauline Celle von andirhalbe hufe landis gelegen zcu Wenigen Libergen unde ouch eynnen schilling sunderlich von eynme gatern da selbins gelegen unde ouch vor seben Schillinge von den vorgnanten guten der kelnern dez vorgnanten clostirs. Gesche des nicht alzo, daz dy vorgnanten zcinse ierlichen of sente Michilstag nicht genczlichen gegebin wordin, so sal sich daz vorgnante clostir an dy selben sine gute wedir haldin, als sye an uns komen syn. Ouch loben wir vor eynnen ganczen vorsezsen zcins der da yezunt vorsezsen ist of den vorgnanten guten genczlichen zcu bezcalde an of zcog of sente Michils tag nach deme, der da nest komit. Zcu warene bekentnisse unde schichirheyt der vorbeschreben stucke unde stete unde gancz zcu haldenne an alle argelist haben wir Reynhart von Holbach, Hannes von Holbach unde Peter Boynstete unse insegele an desen brif gehangen.