Vermercket, daß wir Günther der eller, grave zu Schartzpurck, | her zu Arnstat und Sundershausen, auf heut freitag nach Iubilate anno etc. XC in den gebrechen, so sich zwissen | dem erwirdigen in got vater und her hern Caspern apte in der Pauweln Zelle eins und unsern liben getreuen Heinerich von Grissen anderteils der hulffe geboten und verboten uf deß gedachten Heinerichs von Grissems hoffen in dem dorf Singen gelegen gehalten sie, wie hirnach volget, mit ir beder wissen willen und volboten gutlich vereiniget und vertragen haben, als daß unserß hern von der Zelle auch Heinerich von Grissemß schultesen alleine uber bekentlich schult uf Heinerichs von Grissemß hoffen semptlichen helffen und das helf gelde gleich mit ein ander teilen sollen, waß aber unbekentliche schult were, dar zu man das gerichte geprauchen müse, sol allein daß gerichte uber helffe. Eß sal und mack auch unserß hern von der Zelle schulteheiß uff Heinerichs von Grissems hofen gebiten und verbiten, doch Heinerich von Grissem an seinen erbe zinsen, lihen und fronen an den selben hoffen, dar auf er selbst umb frone und zinse pfenden mack, unschedelich. Deß zu urkunt haben wir gedachter grave Gunther disen receß gleiches lauts gezwifacht und jicklichem teil einen mit unserm ingesigel versigelt.