Czu merkenn, das uff hut dinstag nach sancti Bonifacii im czweiundesobenczigesten jare der minner czal czwischen | den erwerdigen in god vetern unde hern den epten czu Bursfeld, sancti Petri czu Erffurt und von Moncheberg | czu Bomberg unde andern mer von yrer unde anderer presidenten wegen unde des Ordens sancti Benedicti wegen | an eynem unde den erwerdigen unde geistlichen hern, hern Hermann apte unde gancze convente des closters czu Paulinczell am andern teile dorch den edeln wolgeborn hern Heinrichen graven czu Swarczpurgk hern czu Arnstet unde Sundershusen mit sampt des edeln wolgeborn hern Balthasars graven czu Swarczpurg unde hern czu Lutenberg rethen in gutlikeit bered, vorwillet, beteidinget unde beslossen ist, alßo das die gnantin hern czu Paulinczell dy drie substancialia ors ordens noch ußwisunge der regeln sancti Benedicti all sich das woll czemet unde geböret halden wollen, ßo das ouch er Herman der apt vorgenant in siner confirmacion vor sich geret unde gelobet had unde ouch das gemeyne capittel provinciale genannt dorch sich selberst adir eynen andern besuchen unde was dor inne eintrechtiglich beslosßen wert noch gelegeneit unde vormoge ores closters unde mit behaldunge yrer frieheit uff nemen halden wollen, ouch die visitatores des ordens gutlich uffnemen unde die fruntlich unde erlich halden unde yre redeliche underwisunge unde bilche straffunge liden unde ab sich czwischen den vorgnantin apte unde synem convente unde visitatoribus unwille enspanne, das god nicht wulle vorhenge, szo sollin unde wollin die gnantin unsere gnedigen hern von Swarczpurg alßo schutezhern desselben closters dor inne so viel bearbeitin unde met flisse unde ernste dor ane sien, das solliches in gute czufürt unde noch redelikeit abgetragen werde unde hir met sollin alle unwillen, czweitracht unde fürnemen, wie sich die von beiden teiln erhaben adir vorlouffen hetten adir vorgenomen weren alle gancz unde gar abe unde biegethan, vornichtiget unde ewiglich getodit, auch gutlich unde genczlich gerichtet sien unde bliebin, alle argelist unde geverde hir inn gancz ußgeslosßin. Des czu rechter orkunde unde steter vester haldunge synt disser teytingeß czediln czwo gliches lutes gemacht unde iclichem teile eynen gegebin vorsegilt met unsers Günthers apte czu sancte Peter zu Erffurde von der presidenten unde des ordens sancti Benedicti unde unßers Hermanni aptes czu Paulinczelle von unßer unde unßers convents wegen Paulinczelle unde unsers grafin Heinriches von Swarczpurg unde unsers vettern wegen vorgenant hir angehangen ingesigeln im jare unde tage alßo vorgerurt ist.