Wir Iohann von Echte in geistlichenn rechten licentiat, Schulmeister unnd thumherr | der stifftkirchenn sanct Severs zcu Erffurt, Mentzer bischtumbs, bebistlicher richter und conservator | der fryheit und gerechtigkeit deß erwirdigen in goth vaters und hern abbtes der geistlichen väter deß convents und samenunge deß closters zcu der Pauline Celle, sanct Benedicti ordens, thun kunth allen, die disßen brieff sehin ader horen leßen, daß wir etliche czweitracht und irrunge, die der geistliche herr Andreas Gamelvalt, conventual bruder daß gnanten closters zcu der Paulinezcelle von der egnanten herrn abbtes unnd convents da selbst wegen alß ancleger widder die bescheiden Contzen Koller zcu Wenigen Lybergen, Clauße Stein zcu Grosßen Lybergen und Hanße Kerstan zcu Nabinden wonhafftig von der gnanten dryer dorffer wegen dar umb, daß die selbin drye dorffschafft uff den montagk in der nehst vorgangen crutzwochen nach aldem herkomen nicht sien mit yren vannen und crutzen zcu dem gnanten closter Paulinezcell komen, nach habin da selbst und in den kirchen da bie yr oppher gote zcu lobe gegebin, sundern die selben crutzfart von yrer eigen torstigkeit mit rathe yres pherners alße sie bekanten vor wandelt und daß gnante closter Paulinezcell alßo siener altherkomen lobelicher gewonheit beraubt vor uns in gerichte angezcogen hat mit beider obgnanter parthie die alßdann in solicher sache mechtiglich uff uns gewilliget haben guthem willen und volwort gutlichen biegethan und berichtet habin in solicher maße, daß die gnanten drye dorffschafft von Grosßen Lybergen, Wenigen Lybergen und Nabinden dye crutzfart in aller maße alß sie die vor gehalden haben und wie obgerurt ist in der nehsten vorgangenn crutzwochen vorsumet haben uff disßen nehsten montagk nach data dises brieffes in daß gnante closter Paulinezcell und die andern kirchen da bie gehin und volnbrengen auch da yr oppher alß vor thun sollen. Dar zcu sollen sie in die drye kirchen da sie phlegen in zcu gehin bie dem closter in igliche besunder gothe dem almechtigen zcu lobe uff den selbigen montag zcu eyner buße reichen und gebin eyn phunt wachs zcu dem gewonlichen oppher daß sie von alder phlegen zcu thune unnd sollen darnach alle jar widder uff denn montagk in der crutzwochen soliche crutzfart alß sie vor gethan haben gehin und ane widderrede halden unnd ap sie dar inne sumig worden wo vone daß qweme ane deß gnanten abbtes und sienes convents orlaub szo sollen sie dem gnanten closter zcu der Paulinezcell eynen centtner wachs zcu buße vorfallen sien alß ufft und digke daß geschege ane alle widderrede. An solicher vortracht beide parthie eyne gute genuge gehabt habin. Dar bie syn gewest die erßamen hern er Niclaws Koler, thumher zcu dem heiligen born, er Heinrich Bobentzen vicarius der gnanten kirchen sanct Severs und Heinrich Phiffuff clericker Mentzer bischtumbs hirtzu gebethen und geheischt. Deß zcu warem bekentnyß habin wir disßen uffin brieff mit unßerm anhangenden sigille thun vorsigill.