Celestinus episcopus servus servorum dei dilectis filiis Cheboardo abbati et fratribus monasterii sancte Marie de | Cella Paulina salutem et apostolicam benedictionem. Iustis petentium desideriis dignum est nos facilem prebere consensum et | vota, que a rationis tramite non discordant, effectu prosequente complere. Eapropter, dilecti in domino filii, vestris iustis postu|lationibus clementer annuimus et prefatum monasterium sancte Marie de Cella Paulina, in quo divino mancipati estis obsequio, sub beati Petri et nostra protectione suscipimus et presentis scripti patrocinio communimus, statuentes ut, quascunque possessiones, quecunque bona idem monasterium in presentiarum rationabiliter possidet aut in futurum concessione pontificum, largitione regum vel principum, oblatione fidelium seu aliis iustis modis prestante domino poterit adipisci, firma vobis vestrisque successoribus et illibata permaneant. Specialiter autem possessiones, concessiones et alia bona, que venerabilis frater noster Cunradus Maguntinus archiepiscopus, Sabinensis episcopus, rationabiliter monasterio vestro concessit, sicut iuste ac pacifice possidetis, vobis et per vos eidem monasterio auctoritate apostolica confirmamus. Nulli ergo omnino hominum liceat hanc paginam nostre protectionis et confirmationis infringere vel ei ausu temerario contraire. Si quis autem hoc attemptare presumpserit, indignationem omnipotentis dei et beatorum Petri et Pauli apostolorum eius se noverit incursurum. Datum Rome apud sanctum Petrum Kalendis Martii, pontificatus nostri anno quinto.