Iohannes episcopus servus servorum dei dilecto filio . . decano ecclesie Herbipolensis salutem et apostolicam benedictionem. Sua nobis | Hermannus dictus de Scherenberg cellerarius, Albertus dictus custos et Heinricus de Bibers monachi monasterii Celle | Pauline, ordinis sancti Benedicti, Maguntine dioceseos petitione monstrarunt, quod, licet ipsi Bertholdo abbati eiusdem | monasterii obedientiam et reverentiam debitam exhiberent nec eum aliquibus pecoribus vel aliis rebus suis spoliassent, idem tamen abbas pretendens minus veraciter, quod prefati monachi ei inobedientes et rebelles existebant et eundem abbatem quibusdam pecoribus et rebus aliis suis contra iustitiam spoliarant, exarrupto nulla super hiis cognitione prehabita quamquam sibi de pretensis huiusmodi aliquatenus non constaret, prout nec constare poterat, cum ea non essent notoria neque vera, dictisque monachis non vocatis sed absentibus non per contumaciam aucto|ritate - ^^ - a venerabili fratre nostro . . archiepiscopo Maguntino sibi in hac parte commissa in eosdem monachos suspensionis a divinis sententiam promulgavit ipsosque suspensos mandavit et fecit publice nuntiari, propter quod pro parte predictorum monachorum, quam primum hec ad eorum pervenerunt notitiam, sentientium exinde indebite se gravari fuit ad sedem apostolicam appellatum. Cum autem dicti monachi, sicunt asserunt, dicti abbatis potentiam merito perhorrescentes eum infra civitatem seu diocesin Maguntinam nequeant convenire secure, discretioni tue per apostolica scripta mandamus, quatinus vocatis, qui fuerint evocandi, et auditis hincinde propositis, quod iustum fuerit, appellatione remota decernas, faciens quod decreveris per censuram ecclesiasticam firmiter observari. Testes autem qui fuerint nominati si se gratia, odio vel timore subtraxerint, censura simili appellatione cessante compellas veritati testimonium perhibere.