Wir Gunther von Keuernberg der iungere von gotis gnaden grave und herre zu Ilmena, und Lorette | unse elyche wirtin bekennen uffelychen an diseme keinwerdigen brive und tun kund allen den, dy oen | sehen ader hören lesen, daz wir deme wisen und bescheiden manne Gunther Podewytzce, borger zu Ilmene, | und syn erben haben vorkauft recht und redelychen daz dorf zu Wallesleibin mit gerychte, mit halsgerychte, mit lehen, soe sind geystlych ader wertlych, mit allem nutzce, eryn und rechte und mit alle deme, daz dar zo gehored in dorf und in felde als wirs haben gehad vor eyne und sybentzig phund phennynge, dy genge und gebe sind, dy uns nuclychen vorgolden syn und an unsern vromen gewand haben also bescheidenlych als hir nach beschryben sted, daz wir daz selbe dorf weder koufe sullen vor sende Walpurgetage der nest comed ober dry iar wanne wir mögen vor solych geld da wirs umme gegeben haben. Ist aber daz wirs in denselben dryen iaren nichte weder kouften, dez got nicht enwolle, so sal daz vorgenante dorf dez egenante Podewytz und syme erben rechte lehen sy von uns ewiglychen zu besytzene. Ouch ist mer gered, daz wir daz selbe dorf wederkouften vor sende Walpurgetage so sal uns der czins des iares uf sende Michels tag gevallen, ist aber daz wirs weder kouften noch sende Walpurge tage, so sal der selbe zcins deme vorgenanten Podewytzce und syn erben uf sende Michels tage gar und tegerlychen blyben unde zu eime grözern sicherheyd und meryn vestenunge alle der vorbeschryben rede daz dy stete und gantz gehalden werde an argelyst, dez gebe wir deme dicke genanten Podewytzce und syn erben disen keinwerdigen brif vorsegeld mit unserme insegel hir an gehenged, daz wir bede imtrechtiglychen gebruchen zu eyme uerkunde und uffenbarn gezcugenyzse dar ober. Des koufes synd gezcuge dy gestrengen und erbern lute her Borkard von Mulverstete, her Eberhard von Wytzceleibin, her Tyzcel von Kircheim, her Iohannes von Kircheim, rytter, Tyzcel von Lobenstein und ander bederver lute mer, den zu gloubene ist.